Qëllimi i panairit është të krijojë një urë të drejtpërdrejtë mes arsimit, sportit dhe tregut të punës, përmes informimit, frymëzimit dhe ndërveprimit. EDU Fair promovon rëndësinë e zhvillimit të aftësive, edukimit cilësor dhe mirëqenies fizike, duke përgatitur të rinjtë për të ardhmen në një botë që ndryshon me shpejtësi.

Çdo vit, në EDU Fair marrin pjesë universitete, kolegje, shkolla të ciklit të ulët, të mesëm, të mesëm profesional, institucione arsimore dhe qendra trajnuese nga Kosova, rajoni dhe e gjithë bota, që prezantojnë programet e tyre akademike, mundësitë e studimit dhe programet e zhvillimit profesional. Krahas tyre, kompanitë, organizatat dhe federatat sportive sjellin përvoja praktike, profesione të reja dhe mundësi reale karriere.

EDU Fair është mundësi ideale për shkollat profesionale që të promovojnë drejtimet e tyre dhe të lidhen drejtpërdrejt me nxënës, prindër dhe biznese. Duke marrë pjesë si ekspozues, shkollat prezantojnë punën e tyre praktike, krijojnë partneritete me sektorin privat dhe inspirojnë të rinjtë të zgjedhin profesione që garantojnë punësim të sigurt. Ky panair është platforma më e madhe në vend ku arsimi takon tregun e punës dhe ku shkollat profesionale marrin vlerësimin dhe vëmendjen që meritojnë.

Panairi mirëpret nxënës, studentë, prindër, mësimdhënës dhe profesionistë të rinj, të cilët kërkojnë të zbulojnë mundësi të reja studimi, karriere dhe zhvillimi personal. Për dy ditë, EDU Fair bëhet një qendër ndërveprimi ku ide, institucione dhe breza lidhen për të ndërtuar të ardhmen.
Në një kohë kur transformimi digjital, Gjenerata Z dhe tashmë Gjenerata Alpha po riformësojnë mënyrën se si mësojmë, punojmë dhe jetojmë, EDU Fair mbetet ura që lidh dijen me mundësinë dhe të sotmen me të ardhmen.

Çdo institucion, organizatë apo kompani që kontribuon në arsim, aftësim, karrierë, sport dhe zhvillim personal ka vend në këtë panair.
Nëse ofron një mundësi për të mësuar, për t’u zhvilluar ose për të punuar, EDU Fair është vendi yt për t’u lidhur me gjeneratën e ardhshme